Уур амьсгалын УУР АМЬСГАЛЫН ӨНӨӨГИЙН ӨӨРЧЛӨЛТ
Монгол орны нутаг дэвсгэр дээр жигд шахам тархан байрласан цаг уурын ажиглалтын урт цуваат 45 өртөөдийн мэдээгээр тооцоолоход Монгол орны жилийн дундаж агаарын температур 1940-2020 оны хооронд 2.4°С/81 жил (p<0.05 буюу статистик үнэмшилтэй) –аар дулаарч байгаа бөгөөд 1988 оноос хойш эрчимшил эрс нэмэгдсэн байна (Зураг 1).
Зураг 1. Жилийн дундаж агаарын температурын ОЖД (1961-1990 оны дунджийг ОЖД гэж авав)-аас хазайх хазайлт болон олон жилийн эрэмбийн график
Харин дээрх цаг уурын өртөөдөөр тооцоолсон Монгол орны жилийн нийлбэр хур тунадас 1940-2020 оны хооронд тодорхой өссөн буурсан хадлага илрээгүй ч нийт хандлагаар бага зэргийн бууралт ажиглагдаж байна (Зураг 2). Жилийн нийлбэр хур тунадасны олон жилийн явцаас харахад 1997-2011 оны хооронд удаан хугацааны турш ОЖД-аас бага хур тунадас орсон бол сүүлийн 2012,2013,2016,2018,2020 онуудад дунджаас ахиу тунадас оржээ.
Зураг 2. Жилийн нийлбэр хур тунадасны ОЖД (1961-1990 оны дунджийг ОЖД гэж авав)-аас хазайх хазайлт болон олон жилийн эрэмбийн график